«Πνευματική φαρέτρα τοῦ Ὀρθοδόξου Χριστιανοῦ»
ΚΟΝΤΑΚΙΟΝ.
Τῆ ὑπερμάχῳ. Ἦχος πλ. δ.
Τήν ἀθλοφόρον τοῦ Χριστοῦ μεγαλομάρτυρα
Ἀναστασίαν τό τῆς Ρώμης ἐγκαλλώπισμα
καί Μονῆς τῆς Γρηγορίου ἄμαχον σκέπην,
εὐφημοῦντες ἐν ὠδαῖς μεγαλύνομεν,
ὡς προστάτην καί λυτήρα πάσης θλίψεως,
πόθῳ κράζοντες: Χαίροις Μάρτυς πολύαθλε.
Ἄφθορος παιδιόθεν διαμείνασα Κόρη, ἠράσθης τοῦ Παντάνακτος ἄγαν (τρίς). Διό κόσμου τερπνά ὡς σκύβαλα θεωροῦσα, περιχαρῶς ἔδραμες τεμένει ἀσκουσῶν ὡς δορκάς, διό σοι βοῶμεν ταῦτα:
Χαῖρε τῆς Ρώμης βλαστός χαρίτων.
Χαῖρε ταμεῖον ἀρετῶν ἀρρήτων.
Χαῖρε Γρηγορίου Μονῆς τό ἀγλάϊσμα.
Χαῖρε Ὀρθοδόξων λαῶν τό θησαύρισμα.
Χαῖρε πύργε ἀκατάσειστε, ἀπαθείας ὁλικῆς.
Χαῖρε γέρας τοῖς μονάζουσι καί θερμή καταφυγή.
Χαῖρε ὅτι σκιάζεις ὡς νεφέλη Μονήν σου.
Χαῖρε ὅτι Λειψάνων θησαυρόν ἐδωρήσω.
Χαῖρε φωστήρ αὐγάζων τά πέρατα.
Χαῖρε κρατήρ ἐκχέων ἰάματα.
Χαῖρε δι᾿ ἧς ὁ σατάν ἀπεκρούσθη.
Χαῖρε δι᾿ ἧς ὁ Χριστός ἐδοξάσθη.
Χαῖρε Μάρτυς πολύαθλε.
Βίᾳ σύν ἐγκρατείᾳ ἀλγηδόνας παθῶν ἐφυγάδευσας ταχύ πανοσία. Διό διδαχάς ἡγουμένης Μητρός σου οὐκ ἠθέτησας πώποτε, καί φωταυγείας Πνεύματος Ἁγίου δεξαμένη, κράζεις: Ἀλληλούϊα.
Γλῶσσα οὐ δύναται σούς ἀγώνας ὑμνῆσαι ἀξιοχρέως ἀμνάς Χριστοῦ θεοφόρε. Ἐν πολλοῖς ἑαυτήν ἀνεδήσω ἀγωνίσμασι στερρῶς, τῆ παντευχίᾳ Χριστοῦ, βραβεῖα ἐκομίσω, διό σοί ψάλλω ταῦτα:
Χαῖρε παρθένων ἡ εὐθυμία.
Χαῖρε μαρτύρων ἡ θυμηδία.
Χαῖρε τῆς Ἀμπέλου κληματίς ἡ ἀμάραντος.
Χαῖρε τῆς εὐσεβείας κιβωτός ἡ ἀσάλευτος.
Χαῖρε ὄργανον τοῦ Κτίσαντος, δι᾿ οὗ ἠσχύνθη ὁ ἐχθρός.
Χαῖρε σκεῦος θεοτίμητον, δι᾿ οὗ ἐδοξάσθη ὁ Χριστός.
Χαῖρε τῆς Ἐκκλησίας εὐθαλέστατον κρίνον.
Χαῖρε τῆς οἰκουμένης διαυγέστατον ὕδωρ.
Χαῖρε δημίων κάρφος ὀξύτατον.
Χαῖρε εἰδώλων πλῆγμα ἀφόρητον.
Χαῖρε σοφίας διάδημα ξένον.
Χαῖρε ἀμείωτον τῆς πίστεως σθένος.
Χαῖρε Μάρτυς πολύαθλε.
Δύναμις οὐρανόθεν κατεπέμφθη Ὁσία, πληγάς θεραπεῦσαι σαρκός σου, τῶν ἀθέων οὐδόλως ὁρμή συνεστάλη, δαιμόνων γάρ θεράποντες ὄντες, Χριστοῦ οὐκ ἤδεισαν ὑμνεῖν τά μεγαλεῖα οὕτως, ἀλληλούϊα.
Ἔνθερμον ἐν καρδίᾳ, ὡς ἀχθεῖσα θεάτρῳ, Νυμφίῳ τῶ σῶ ἔσχες ἀγάπην. Ὡς οὐδέν οὖν βασάνων πληθύν λογισαμένη, χαίρουσα ὑπήνεγκας τοσαῦτα δεινά, πάντων ἐκβοώντων πρός σέ ἀσιγήτως:
Χαῖρε τριπλοῦν δεξαμένη στέφος.
Χαῖρε πιστῶν ἀσθενούντων σθένος.
Χαῖρε εὐσεβῶν ἀπροσμάχητον ἔρεισμα.
Χαῖρε μοναστῶν εὐκλεέστατον ἔμβλημα.
Χαῖρε ὅτι καθυπέμεινας ἀγογγύστως τά δεινά.
Χαῖρε ὅτι διεσκέδασας τυραννούντων μηχανάς.
Χαῖρε ὅτι ἰκρίῳ προσεπάγης ἁγία.
Χαῖρε ὅτι παττάλοις προσεδέθης ὀλβία.
Χαῖρε τοῖς ἀγγέλοις ἆσμα ὀξύφωνον.
Χαῖρε τοῖς ἀνθρώποις κάλλος ἀμήχανον.
Χαῖρε δαρμούς τῶ προσώπῳ δεχθεῖσα.
Χαῖρε ξεσμοῖς μεληδόν ἐκκοπεῖσα.
Χαῖρε Μάρτυς πολύαθλε.
Ζήλῳ ἔνδον ἀπλέτῳ ἑνωθῆναι Νυμφίῳ, ὡς ἔχουσα Ὁσία, ὑπέμεινας ἀνδρειοφρόνως αἰκισμούς καί στρεβλώσεις τοῦ σώματος. Οὐκ ἴσχυσαν γάρ ἐχθρῶν ἀπειλαί καί κολακεῖαι ὑποσκελίσαι σοι, πρός οὕς ἐβόας, ἀλληλούϊα.
Ἤνθησας κοσμηθεῖσα ἀρεταῖς ὡσεί ρόδα καί ἤγειρας δαιμόνων μανίαν, διό ἔπαρχοι βασιλέως, ὡς υἱοί ἀσεβείας, προσέδραμον ἁρπάσαι ἐκ τῆς Μονῆς σου ἁγνή, διό σοι προσφωνοῦμεν ταῦτα:
Χαῖρε ἀμνάς τοῦ Χριστοῦ καλλιμάρτυς.
Χαῖρε ἡμῶν ἡ φρουρός καί προστάτις.
Χαῖρε ἰσαγγέλου ζωῆς τό ὀσφράδιον..
Χαῖρε ἀσκητῶν μεσιτείας σκιάδιον.
Χαῖρε ὅτι ἐργαστήριον ἀνεδείχθης προσευχῆς.
Χαῖρε ὅτι ἁγιότητος ὤφθης οἶκος εὐπρεπής.
Χαῖρε τῶν Ἀθλοφόρων τό ἡδύπνοον ἄνθος.
Χαῖρε τῶν προστρεχόντων τό περίδοξον θάρσος.
Χαῖρε Μονῆς ἡμῶν τό κραταίωμα.
Χαῖρε Πατέρων ὄντως ἑδραίωμα.
Χαῖρε δι’ἧς κατεπνίγη ὁ δράκων.
Χαῖρε δι’ἧς κατησχύνθη ὁ ἄρχων.
Χαῖρε Μάρτυς πολύαθλε.
Θεαμάτων ἀρρήτων κοινωνός γεγονυῖα, ἐκρίζωσιν ὀδόντων, ὀνύχων καί σαρκός αὐλακώσεις στερρῶς καθυπέμεινας Ἀναστασία μάκαρ. Ἡμεῖς οὖν ἐκπληττόμενοι τῶ ἀκούσματι τούτων βοῶμεν, ἀλληλούϊα.
Ἴσης δόξης τοῖς ἄλλοις ἠξιώθη Ὁσία τό πνεῦμα σου καί πλείω τούτων ἐν Χώρᾳ δικαίων. Διαδήματι γάρ παμφαῶς τρισσῶ κοσμηθεῖσα παρθενίας πρῶτον, ἀσκήσεως σύν τοῖς ἄθλοις σου ἐξ ὑστέρων, χαίρειν βοῶμεν σοι ταῦτα:
Χαῖρε Χριστῶ μυστικῶς ἑνωθεῖσα.
Χαῖρε σαρκί ἀβλαβῶς φλεχθεῖσα.
Χαῖρε ὅτι δι’εὐχῆς σαυτήν ἰάτρευσας.
Χαῖρε ὅτι ἀσεβεῖς τρανῶς ἐξέπληξας.
Χαῖρε τύραννον μισάνθρωπον ὀνειδίζουσα δεινῶς.
Χαῖρε γλώττης ὑπομείνασα ἐκκοπήν καί τῶν μαστῶν.
Χαῖρε ἡ θεολόγον λαλιάν κεκτημένη.
Χαῖρε ἡ διά πίστιν Ἰησοῦ βεβλημένη.
Χαῖρε τροχοῦ βασάνους ἡ στέργουσα.
Χαῖρε φλογί τήν σάρκα προσφέρουσα.
Χαῖρε λαμπτήρ καταυγάζων ἐν σκότει.
Χαῖρε κρηπίς μοναζόντων τοῖς τρόποις.
Χαῖρε Μάρτυς πολύαθλε.
Κάμινος ἀναφθεῖσα ὡς εἰς παῖδας ἐν Βαβυλώνι ποτέ, νεάνιδος ψυχήν ἐκφοβῆσαι, ἀλλ’εἰς μάτην ἐχθροῦ πανουργίαι ἐπέδραμων. Ἔσχε γάρ αὕτη Παντοδύναμον συνεργόν, πρός Ὅν ἐβόα ἀσιγήτοις ὕμνοις: Ἀλληλούϊα.
Λάμψις τοῦ σοῦ προσώπου περιηύγασε πάντας κυκλόθεν θεάτρῳ ἑστηκότας. ὁρῶντες οὗτοι τά φαινόμενα Θεόν ὡμολόγουν τόν Χριστόν, τιμῶντες ὁμοῦ τήν Αὐτοῦ ὁσιόαθλον νύμφην ἐβόων:
Χαῖρε ὁμόσκηνε τῶν Ἀγγέλων.
Χαῖρε συνόμιλε τῶν δικαίων.
Χαῖρε ἡ γυμνῶ τῶ σώματι νικήσασα.
Χαῖρε ἀσεβῶν τάς πλοκάς διαλύσασα.
Χαῖρε ὅτι φάλαγγας ἐτρόπωσας ἀπιστίας εὐθαρσῶς.
Χαῖρε ὅτι τρόπαια ἐκόμισας εὐψυχίας τῶ Θεῶ.
Χαῖρε ἔσοπτρον θεῖον ἀθλητῶν καί ὁσίων.
Χαῖρε κλῆμα σταλάζον γλυκασμόν σῶν αἱμάτων.
Χαῖρε σορός ἰάματα ἡ βρύουσα.
Χαῖρε ἡμᾶς λιταῖς σου κουφίζουσα.
Χαῖρε ἡ νύμφη οὐρανῶν Βασιλείας.
Χαῖρε ἡ πτῶσις ἀνόμων τυραννίας.
Χαῖρε Μάρτυς πολύαθλε.
Μέμνημαι καθ’ἑκάστην ἀνδρικῶν σου σκαμμάτων, συνθλάσεις ὀστῶν, σαρκός τε τάς ξέσεις, μαστιγώσεις καί ξένας ἐπινοήσεις ἐχθροῦ τῆς ἀληθείας, ὅλως ἐκπληττόμενος βοῶ σύν τοῖς ἀγγέλων χοροῖς: Ἀλληλούϊα.
Νίκην εἴληφας ὦ Μάρτυς, ἀφανίζουσα πλάνης τό πολύθεον δόγμα, δημίων κεφαλάς ἐταπείνωσας τῆ εὐσθενῆ σου στάσει, ἄγουσα ἐν ἀπορίᾳ αὐτῶν τήν διάνοιαν, οἵτινες συστελλόμενοι ἐβόων:
Χαῖρε τό κλέος τῆς ἀφθαρσίας.
Χαῖρε ἡ δρόσος τῆς μετανοίας.
Χαῖρε ἀσκουμένων ἡδύτατον καύχημα.
Χαῖρε τῶν δαιμόνων θανάσιμον ράπισμα.
Χαῖρε φέγγος ἀστραπόμορφον καί πυρσός ἀειλαμπής.
Χαῖρε μύστις ἐπιλάμψεων καί σοφῶν ἡ καλλονή.
Χαῖρε ἀνδρειοφρόνως τούς ἐχθρούς καθελοῦσα.
Χαῖρε εὐσεβοφρόνως τόν Χριστόν θεωροῦσα.
Χαῖρε Ἁγίου Ὄρους ἀγλάϊσμα.
Χαῖρε Μονῆς Γρηγορίου διάσωσμα.
Χαῖρε βλαστέ νοητοῦ Ἀμπελῶνος.
Χαῖρε λειμών εὐθαλής καί εὐώδης.
Χαῖρε Μάρτυς πολύαθλε.
Ξενοτρόπως ἰδόντες τό ἀσάλευτον Κόρη τῆς γνώμης οἱ τοῦ ὄφεως μύσται, θηριώτεροι αὖθις γεγονότες, ἐκκόψαι τήν γλῶτταν σου ἐνετείλαντο, οὐ γάρ ταύτης τούς ἐλέγχους ἠνείχοντο, πρός οὕς ἀνεβόας. Ἀλληλούϊα.
Ὅπλον τοῖς προσιοῦσι τῆ ροπῆ πρεσβειῶν σου, ἐγνώσθης Χριστομίμητε Κόρη, θησαυρόν γάρ παντίμων λειψάνων κατέχοντες ἐκ πόθου ἑκάστοτε προσπίπτομεν δεόμενοι καί ψάλλοντες πρός σέ τοιαῦτα:
Χαῖρε εἰδώλων μανίας ἡ λύσις.
Χαῖρε λατρείας ἀπίστων ἡ δύσις.
Χαῖρε ἁλουργίς Βασιλέως ἐπίλεκτος.
Χαῖρε χελιδών παραδείσου περίδοξος.
Χαῖρε ἡ καταφρονοῦσα ἡγεμόνος ἀπειλάς.
Χαῖρε ἡ ἐγκαρτεροῦσα τῶν ἐπάθλων ἀμοιβάς.
Χαῖρε ἡ καιομένη καί μή δαπανωμένη.
Χαῖρε ἡ καθελοῦσα καί μή καθελομένη.
Χαῖρε δι’ἧς πιστοί θεραπεύονται.
Χαῖρε δι’ἧς ἐχθροί φυγαδεύονται.
Χαῖρε ἐν σταυρῶ ἀπηνῶς τανυσθεῖσα.
Χαῖρε πυρί χαλεπῶς ἐκκαυθεῖσα.
Χαῖρε Μάρτυς πολύαθλε.
Πάλαι δίαυλον βίου τοῦ μονήρους ἀνύσασα Μάρτυς, καθυπέταξας πάθη ταῖς δακρύων ροαῖς ὁλικῶς. Ὕστερον προσκληθεῖσα ἄφνω ἐν θεάτρῳ ἀσεβῶν, τῆ πανσθενῆ τοῦ Ἄνακτος δυνάμει, Τοῦτον ὡμολόγεις οὕτως: Ἀλληλούϊα:
Χαῖρε ἁγνείας σεπτόν ἀγγεῖον.
Χαῖρε ἀγάπης κλεινόν ταμεῖον.
Χαῖρε Ἀναστάσεως νύμφη ἐπώνυμος.
Χαῖρε ἀντιστάσεως στήλη ἀκλόνητος.
Χαῖρε ὅτι συνετρίβησαν μηχαναί τοῦ πονηροῦ.
Χαῖρε ὅτι ἐπτερώθησαν αἱ καρδίαι τοῦ λαοῦ.
Χαῖρε τῶν Ὀρθοδόξων τό ἡδύτατον κρᾶμα.
Χαῖρε τῶν ἀλλοπίστων τό παράδοξον θαῦμα.
Χαῖρε πιστῶν σοφίας ὑπόθεσις.
Χαῖρε ἡμῶν εἰρήνης ἀπόθεσις.
Χαῖρε βασάνους φαιδρῶς ἐνεγκοῦσα.
Χαῖρε στεφάνους ἀφθάρτους λαβοῦσα.
Χαῖρε Μάρτυς πολύαθλε.
Σοί τό σφάγιον ὄντως τοῦ Δεσπότου τῶν ὅλων αἱ τάξεις μοναζόντων προσάγοντες ὠδήν εὐφρόσυνον ὑμνοῦσιν ἀκαταπαύστοις μελωδίαις, παρθενομάρτυς, τά ἀνήκουστα παλαίσματα δι’ἅ βοῶσιν: Ἀλληλούϊα:
Τέλους τοῦ μακαρίου ἠξιώθης Ὁσία, τμηθεῖσα τῶ ξίφει πανενδόξως. Ἔσχες σύνανθλον Κύριλλον, νέον τινά, ὅς δραμών ὕδατι τήν γλῶτταν σου ἀναψῦξαι, προσεδέξατο τόν θάνατον, προσφωνῶν τοιαῦτα:
Χαῖρα ἀπάνθισμα παρθενίας.
Χαῖρε ὑπόδειγμα ἐγκρατείας.
Χαῖρε τῆς Τριάδος θυμίαμα εὔοσμον.
Χαῖρε τῆς Ἐκκλησίας προπύργιον ἔξοχον.
Χαῖρε σύ γάρ ἀπεκάθηρας τῶν εἰδώλων μολυσμούς.
Χαῖρε σύ γάρ ἀπεσόβησας τοῦ Βελίαρ αἰκισμούς.
Χαῖρε ἡ μεθυσθεῖσα τῆ ἐφέσει τῶν ἄνω.
Χαῖρε ἡ μελισθεῖσα ὥσπερ δένδρον ἀσπλάγχνως.
Χαῖρε σεπτόν ἀλάβαστρον χάριτος.
Χαῖρε λιμήν γαλήνης πανάριστος.
Χαῖρε Χριστοῦ καλλιέρημα θεῖον.
Χαῖρε πιστῶν εὐωδέστατον μῦρον.
Χαῖρε Μάρτυς πολύαθλε.
Ὕλην ἅπασαν πάντῃ ἀπωθεῖσα παθῶν σου, μεθέξει δραστικῆς παρουσίας τοῦ Παντάνακτος Ὁσία, ἐλάμπρυνας σεαυτήν καί καθαρόν τέμενος Χριστοῦ γεγονυῖα μετά δόξης ἐκβοᾶς ἡμῖν ἀπαύστως. Ἀλληλούϊα.
Φοινιχθεῖσα αἱμάτων ταῖς ροαῖς Πανοσία, χιτῶνα βασιλέων κρείττονα ἐνεδύθης, καί νῦν ἐξαστράπτουσα πάνυ, μετά τῶν Ἀσωμάτων ἐν ἀγήρῳ μακαριότητι, ἄκουε ἡμῶν βοώντων:
Χαῖρε λαμπάς νοητοῦ Ἡλίου.
Χαῖρε κατάπτωσις τοῦ δολίου.
Χαῖρε καλλονή τάς ψυχάς κατευφραίνουσα.
Χαῖρε ἀστραπή τούς ἐχθρούς καταφλέγουσα.
Χαῖρε ὅτι ἀναδέδειξαι ἀθλοφόρων ἡ κρηπίς.
Χαῖρε ὅτι ἐξηφάνισας ἀλλοτρίου τήν ὀργήν.
Χαῖρε παραμυθίας ἀκατάλυτον τεῖχος.
Χαῖρε χειμαζομένων ἀδιάρρευστος πύργος.
Χαῖρε νοσούντων ἄκος ταχύτατον.
Χαῖρε πενθούντων ἔρεισμα ὕστατον.
Χαῖρε ἡ σκέπη Μονῆς Γρηγορίου.
Χαῖρε τοῦ Ἄθω κλέϊσμα θεῖον.
Χαῖρε Μάρτυς πολύαθλε.
Χάριτος ἠξιώθης ὁσιόαθλε Κόρη, ἐν Μάνδρᾳ γυναικῶν καί σταδίῳ, ἔνθα πίστει ὁπλισθεῖσα ἐχθρούς ἀοράτους καί ὁρατούς κεταπλήγωσας δι’εὐχῆς ἀναβοῶσα παρρησίᾳ οὕτως: Ἀλληλούϊα.
Ψάλλοντές σοι τόν ὕμνον, ἱκετεύομεν Μῆτερ, ὡς ἔχουσα Θεῶ παρρησίαν, τούς μονάζοντας ὧδε χειρί πρεσβειῶν σου ἐκ τῶν τοῦ πολεμήτορος σκανδάλων ἐξελοῦ, ἵνα δοξάζομέν σε ἀνυμνοῦντες:
Χαῖρε ἡ μάρτυς ἐν ταῖς Ὁσίαις.
Χαῖρε Ὁσία ἐν ταῖς Ἁγίαις.
Χαῖρε θεοπλόβλητε Νύμφη ἐν χάριτι.
Χαῖρε θεοκόσμητε Κόρη ἐν Πνεύματι.
Χαῖρε τρόπαιον ἀπτόητον μαρτυρίου χαλεποῦ.
Χαῖρε σκήνωμα θεόδμητον, πλῆρες δόξης ἀκραιφνοῦς.
Χαῖρε τῶν Ὀρθοδόξων ἀεισέβαστον γέρας.
Χαῖρε τῶν μοναζόντων οὐρανόφωτον σέλας.
Χαῖρε τῶν θλιβομένων παράκλησις.
Χαῖρε τῶν ἀσεβούντων ἡ κάκωσις.
Χαῖρε ἡμῶν ταχινή ἰατρεία.
Χαῖρε ψυχῶν ἐναργής ἱκεσία.
Χαῖρε Μάρτυς πολύαθλε.
Ὦ Πανσέβαστε Κόρη, εὐλαβῶς προσκυνοῦντες Λειψάνων σου θησαύρισμα θεῖον. (τρίς). Ἱκετεύομεν ρῦσαι ἡμᾶς ἐκ συμφορῶν ποικίλων τοῦ ὄφεως καί δέξαι ἡμῶν τήν ὠδήν ταύτην, δι’ἧς βοῶμεν ἀπαύστως: Ἀλληλούϊα.
ΚΟΝΤΑΚΙΟΝ.
Τῆ ὑπερμάχῳ. Ἦχος πλ. δ.
Τήν ἀθλοφόρον τοῦ Χριστοῦ μεγαλομάρτυρα
Ἀναστασίαν τό τῆς Ρώμης ἐγκαλλώπισμα
καί Μονῆς τῆς Γρηγορίου ἄμαχον σκέπην,
εὐφημοῦντες ἐν ὠδαῖς μεγαλύνομεν,
ὡς προστάτην καί λυτήρα πάσης θλίψεως,
πόθῳ κράζοντες: Χαίροις Μάρτυς πολύαθλε.
Διά χειρός μοναχοῦ Δαμασκηνοῦ Γρηγοριάτου ἐν σωτηρίῳ ἔτει 1979.
Μέ τήν εὐλογία τοῦ πατρός Δαμασκηνοῦ Γρηγοριάτου
